Сәтбаев университеті IMPACT бағдарламасын іске қосып, инженер кадрларын дамытудың жаңа бағыттарын ашуда

Сәтбаев университеті өнеркәсіптік компаниялардың және халықаралық серіктестердің қатысуымен IMPACT (Industry-aligned Minor Programs for Applied Career Training) жобасымен таныстыру рәсімін өткізді. Іс-шараға Caterpillar Foundation, Assist International, BorusanCAT және Purdue University өкілдері қатысты. Кездесу барысында университет ЧПУ станоктарының операторларын даярлау бағыты бойынша тәжірибеге бағдарланған инженерлік білім беру бағдарламасымен таныстырды. Бағдарламаның негізгі мақсаты – студенттерге академиялық оқудан нақты өнеркәсіп өндірісіне ауысу үшін қажетті құралдарды, практикалық дағдыларды меңгеріп, кәсіби сенімділікті қалыптастыру.

Сәтбаев университетінің қауымдастырылған профессоры және IMPACT жобасының жетекшісі доктор Руслан Мұқанов Caterpillar Foundation тарапынан көрсетілген қаржылық қолдау, Assist International ұйымымен серіктестік, сондай-ақ олардың сараптамалық қолдауы мен тұрақты кері байланысы жобаның табысты түрде іске қосылуының негізгі факторлары болғанын атап өтті. Қатысушылар сонымен қатар Purdue University-мен ынтымақтастық қарым-қатынас туралы да талқылады. Аталған университеттің сарапшылары заманауи өндіріс саласында кадр даярлаудың озық стандарттарын енгізуге және америкалық білім беру үлгілері негізінде бірлескен курстар әзірлеуге қолдау көрсетуде.

Caterpillar Foundation-ның Қазақстандағы қоғамдық елшісі Жанна Әбдірахманова жобаның стратегиялық маңыздылығын жоғары бағалап, былай деді:

«Бұл жұмысты біз шамамен алты ай бұрын бастаған едік, ал бүгін оның алғашқы нәтижелерін көріп отырмыз: инфрақұрылым жаңғыртылды, ал IMPACT бағдарламасы іске қосылды. Caterpillar Foundation атынан жас мамандарға практикалық дағдылар мен әлемдік үздік технологияларға нақты қолжетімділік беретін бастамаларды қолдау біз үшін өте маңызды».

Assist International бағдарламасының менеджері Тревор Кук Сәтбаев университеті мен Purdue University және халықаралық ұйымдар арасындағы екі жылдық ынтымақтастықтың нәтижелерін атап өтті. Ол өз сөзінде былай деді:

«Шамамен екі жыл бұрын біз доктор Мұқановпен бірге мұндай жоба қандай болуы мүмкін екенін талқылаған болатынбыз – Сәтбаев университеті мен Purdue University арасындағы серіктестік академиялық бағдарламаларды қалайша күшейте алады, техникалық даярлық сапасын қалай арттырады және студенттерге алғашқы күннен бастап индустрияда сұранысқа ие дағдыларды қалайша үйрете алады деген мәселелерді қарастырдық. Бүгінде сол бастапқы жоспарлардың шындыққа айналып отырғанын көру ерекше қуанышты: студенттер қазірдің өзінде білім алып, жаңа білім беру кеңістіктерінің артықшылықтарын пайдалануда».

«Әрине, мұның барлығы Caterpillar Foundation қорының тамаша қолдауы арқасында мүмкін болды – олар қаржыландыру түрінде де, бағдарламаны дамытуға да терең атсалысты».

Мәселелерді талқылау барысында қатысушылар академиялық даярлықты индустрия талаптарына барынша сәйкестендіру қажет екендігін атап өтті. IMPACT бастамасы бұл сұранысқа жауап бере отырып, үш микробіліктілікті ұсынады – Digital Design Engineer, Reverse Engineering Design Engineer және CNC Machine Operator. Бұл бағыттар студенттерге SolidWorks, 3D-сканерлеу, аддитивті өндіріс және ЧПУ бағдарламалау сияқты салаларда индустрия тарапынан расталған практикалық дағдылар береді.

Университеттің білім беру бағдарламаларына біріктірілген бұл микробіліктіліктер студенттерге екінші курстан бастап-ақ алғашқы кәсіби құзыреттерді игеруге мүмкіндік береді.

IMPACT бастамасының арқасында Сәтбаев университеті өңірдегі техникалық хаб ретінде өз рөлін күшейтіп, инновациялар мен жаһандық ынтымақтастық арқылы инженерлік білім беруді жаңғырту бағытында маңызды қадам жасауда.

Әрбір микробіліктілік заманауи технологияларды жедел әрі терең түрде меңгеруді қамтамасыз ететіндей етіп құрастырылған. Микробіліктіліктер академиялық бағдарламаларға толықтай біріктірілгенін және олардың форматы индустрия сұраныстарына сәйкес келетінін университет өкілдері ерекше атап өтті, өйткені практикалық дағдылар бүгінде шешуші факторға айналып отыр.

Сәтбаев университеті инфрақұрылымды дамыту және халықаралық ынтымақтастықты кеңейту арқылы өңірдегі жетекші техникалық орталық ретінде өз позициясын нығайтуды көздейді. Университет басшылығы жобаға қатысқан оқытушыларға, студенттерге және серіктестерге алғыс білдіре отырып, IMPACT бағдарламасының іске қосылуы – инженерлік білім беруді жаңғырту жолындағы маңызды әрі ұзақ мерзімді жұмыстың бастамасы ғана екенін атап өтті.