Сәтбаев университеті: Қазақстанның энергетикалық астанасының жаңа цифрлық болашағын қалыптастыру

Сәтбаев университеті Екібастұз қаласы әкімінің орынбасары Қаныш Әділжановтың басшылығымен келген әкімдік делегациясын қабылдады. Университет басшылығы қонақтармен технологиялық даму, цифрландыру және инженерлік кадрлар даярлау салалары бойынша өзара ынтымақтастық қарым-қатынастың болашағы туралы талқылады. Бұл бастамалар қалалық ортаның сапасын арттыру мен техногендік жүктемені төмендетуге бағытталған.

Екібастұз – Қазақстан үшін стратегиялық маңызы зор, индустриялық орталық болып саналады. Мұнда әлемдегі ең ірі көмір разрезі мен ең биік түтін мұржасы орналасқан. Бұл өңірдің энергетикалық әлеуеті орасан зор, алайда ол өзінің ауқымды инфрақұрылымын қолдау мен жаңғыртып отыру ісінде елеулі сын-қатерлерге тап болады.

Сәтбаев университетінің командасы осы сын-қатерлерді шешудің кешенді стратегиясын – яғни «Цифрлық Екібастұз» платформасын ұсынды. Бұл жоба озық зерттеулер мен инновацияларды біріктіретін бірыңғай экожүйе болып табылады және негізгі екі модульге негізделген:

• Digital Foundation – қаланың цифрлық егізі. Ол әрбір ғимараттың, геологиялық қабаттардың және ең бастысы – жер асты инженерлік желілерінің 3D-моделін қамтиды.
• AI Platform – осы жүйенің «миы». Ол сараптама жасау мен шешім қабылдауды қамтамасыз етеді: инфрақұрылымдық тәуекелдерді болжау, қоғамдық қауіпсіздікке арналған жасанды интеллект негізіндегі бейнеаналитика (SafeKids.AI), сондай-ақ әкімдік жұмысының тиімділігін арттыруға бағытталған интеллектуалды автоматтандыру.

Жобаның негізінде технологиялық егемендік қағидаты жатыр, оған Сәтбаев университеті ерекше мән береді. Жасанды интеллекттің барлық платформасы жергілікті деңгейде орналастырылған, яғни барлық деректер мен сараптамалық талдаулар толығымен әкімдік бақылауында болады. Сыртқы бұлттық тәуелділіктер мүлде жоқ – деректер қауіпсіз жағдайда сақталады, әрі цифрлық тәуелсіздік толығымен қамтамасыз етіледі.

Сапардың екінші күні делегация «Алатау инновациялық технологиялар паркі» еркін экономикалық аймағында орналасқан бірқатар өндірістік нысандарды аралады. Қонақтар фильтрлеу элементтері мен кері осмос мембраналарын өндіруді, радиациялық-модификацияланған жылу шөгуші материалдар өндірісін, сондай-ақ жылу, су, газ және электр энергиясын есепке алу жөніндегі цифрлық аспаптар мен жүйелердің өндірісін тамашалады. Оларды қазақстандық NERO GROUP компаниясы жасап шығарады.

Біз ғалымдарымыз бен серіктестеріміздің әлемдік деңгейде жасаған шешімдерімен мақтанамыз. Сәтбаев университеті Екібастұздың стратегиялық серіктесіне айналып, ғылым мен технологияны пайдалану арқылы Қазақстанның энергетикалық астанасының қауіпсіздігін, тиімділігін және тұрақты дамуын қамтамасыз етуге дайын.