Satbayev University-де студенттердің республикалық IT-жобалар байқауы өтті

Satbayev University қабырғасында өткен IT саласындағы студенттік жобалар мен зерттеулер байқауы университеттің барлық институттарының талантты студенттерін біріктіріп, олар өздерінің цифрлық экономиканың басым бағыттарындағы — жасанды интеллект, киберқауіпсіздік, онлайн-алаяқтықтың алдын алу, финтех-жобалар және қаржы секторы үшін цифрлық шешімдер бойынша әзірлемелерін ұсынды.

Байқаудың басты мақсаты — жастардың инновациялық белсенділігін қолдау, перспективалы идеяларды анықтау және заманауи технологияларды елдің қаржы-банк саласының дамуына енгізуді ынталандыру болды. Ұйымдастырушылар атап өткендей, бұл шара финтех және ақпараттық қауіпсіздік салаларында инновация бастамашылары болып табылатын студенттерді ынталандырудағы маңызды қадамға айналды.

Қатысушылар жоғары кәсіби дайындықтарын және өзекті мәселелерді шешуде IT-құралдарды қолдану қабілеттерін көрсетті. Жобалар таныстырылымдары сарапшылардың пікірлерімен және ашық пікірталастармен қатар жүріп, байқау тәжірибе алмасу, желілік өзара іс-қимылды дамыту және индустрия өкілдерінен практикалық ұсыныстар алу алаңына айналды.

Байқау қорытындысы бойынша «Ақпараттық қауіпсіздік» мамандығының 3-курс студенті Ерлан Мамутұлы Аяпов «Федеративті оқыту негізінде IoT жүйелеріндегі кибершабуылдарды анықтау жүйесін зерттеу және әзірлеу» жобасымен бірінші орынды иеленді. Екінші орындарға Жансұлтан Райбеков (жасанды интеллект арқылы алаяқтық транзакцияларды болжау жобасы), Руслан Ниязбай, Адилет Абдамбай және Дана Асет (қаржылық сауаттылыққа арналған финтех-стартап идеясы), сондай-ақ Асыл Азатбек (компьютерлік көру арқылы ым тілі жүйесін автоматты тану жобасы) ие болды.

Қазылар алқасы ұсынылған жобалардың жоғары деңгейін атап өтіп, студенттердің бастамалары Қазақстанның цифрландыру стратегиясының басым бағыттарымен үндес екенін жеткізді. Сарапшылардың пікірінше, бұл байқау Satbayev University студенттерінің инновациялар, инженерлік ойлау және ғылыми зерттеулерді дамытуға белсенді қатысуының жарқын үлгісі болды.

Елдің алғашқы техникалық жоғары оқу орны ретінде Satbayev University инженерлік білім беруді дамытып, Қазақстандағы инновациялар мен цифрлық технологиялардың жетекші орталығы ретіндегі мәртебесін нығайтып келеді.