Satbayev University қаржылық сауаттылық форумы өтті: студенттер тәуекелдерден қорғануды және болашақты жоспарлауды үйренді

Қаржылық жауапкершілік, ақылға қонымды кредиттеу, жеке қаржы және алаяқтықтан қорғану – 24 қазан күні Satbayev University-де өткен «Халықтың әл-ауқатын арттыру факторы ретінде қаржылық сауаттылық» форумының негізгі тақырыптары болды. Шара студенттерді, қаржы нарығы сарапшыларын және бизнес өкілдерін біріктіріп, қаржылық мәдениеттің тек дағды ғана емес, қоғамның тұрақты дамуының бір бөлігі екенін көрсетті.

Форумды Satbayev University Жобаларды басқару институты Қазақстан Республикасының Қаржы нарығын реттеу және дамыту агенттігімен бірлесіп, Fingramota.kz жобасының және серіктестердің – Еуразиялық банк, KMF-Демеу және «Еуразия» ӨСК қолдауымен ұйымдастырды.

Satbayev University-дің ғылым және халықаралық байланыстар жөніндегі директорының орынбасары Назым Жұнусбекова бұл шара университет институты мен Қаржы нарығын реттеу және дамыту агенттігі арасындағы келісім аясында жүргізіліп жатқан жүйелі жұмыстың жалғасы екенін атап өтті. Осы келісім шеңберінде Жобаларды басқару институты Fingramota.kz жобасы аясындағы Агенттік мамандарымен бірлесіп, студенттерге қаржылық жоспарлау қағидаттары, жеке жауапкершілік және алаяқтықтан қорғану туралы дәрістер, семинарлар, дөңгелек үстелдер мен форумдарды тұрақты түрде өткізеді.

«Біз алаң ұсынамыз, сарапшыларды шақырамыз және студенттеріміз тек тыңдаушы емес, белсенді қатысушы болатын диалог құрамыз. Олар сұрақ қояды, өз бейнероликтерін түсіреді, цифрлық қатерлер күнделікті өмірдің бір бөлігіне айналған қазіргі әлемде қаржылық сауатты әрі қауіпсіз болу жолдарын бөліседі», – деді Назым Жұнусбекова.

Форум интерактивті викторинамен және «Кредит лайк емес: рәсімдемес бұрын ойлан!» атты бейнероликтер байқауымен түйінделді. Қатысушылар жастардың қаржылық қауіпсіздік пен цифрлық кеңістіктегі саналы мінез-құлықты қалай түсінетінін креативті жұмыстар арқылы көрсетті. Fingramota.kz жобасының сарапшылары таңдаған үздік бейнероликтер ел бойынша көрсетіледі. Жеңімпаздар серіктестер атынан құнды сыйлықтарға ие болды – ноутбук, планшеттер және смарт-сағаттар.

Satbayev University-дегі форум БҰҰ Тұрақты даму мақсаттарына (SDGs) және ESG қағидаттарын ілгерілетуге қосылған тағы бір қадам болды. Ол студенттерге қаржыны дұрыс басқаруға көмектесіп, өздері мен отбасылары үшін экономикалық өсімге жол ашады. Қаржылық сауаттылық пен жауапты мінез-құлықты дамыту арқылы университет жылдам өзгеретін әлемде саналы шешім қабылдай алатын экономикалық тұрғыдан белсенді, хабардар және әлеуметтік тұрғыдан орнықты ұрпақты қалыптастыруға үлес қосуда.