Satbayev University студенттері Францияда өткен ActInSpace 2026 халықаралық финалында Қазақстанның атынан өнер көрсетті

Францияның Бордо қаласында ActInSpace 2026 халықаралық ғарыштық технологиялар байқауының екінші кезеңі — халықаралық жартылай финал мен финал өтті. Оған әртүрлі елдердегі жергілікті және ұлттық кезеңдердің жеңімпаз командалары қатысты.

Satbayev University атынан халықаралық кезеңге бакалавриаттың 3-курсындағы бес студенттен құралған SUniverse командасы қатысты. Команда бұған дейін Қазақстандағы ұлттық кезеңнен сәтті өтіп, ғарыштық технологиялар саласындағы беделді халықаралық байқаулардың бірінің финалдық кезеңінде өз жобасын таныстыру мүмкіндігіне ие болды.

Байқау аясында студенттер спутниктік телеметрияны талдауға арналған жасанды интеллект негізіндегі жобаны ұсынды. Команда әзірлеген шешім деректерді өңдеуді автоматтандыруға, аномалияларды анықтауға және спутниктік жүйелердің күйін болжауға бағытталған. Мұндай тәсіл шағын ғарыш аппараттары үшін аса маңызды, өйткені телеметриялық деректерді уақтылы және дәл талдау миссияның сенімділігі мен тұрақтылығына тікелей әсер етеді.

SUniverse жобасы аэроғарыш саласы үшін өзекті мәселені шешуге бағытталған: телеметриялық деректердің үлкен көлемі әлі де көбіне қолмен өңдеуді талап етеді, бұл операторларға түсетін жүктемені арттырып, ақауларды ерте кезеңде анықтауды қиындатады. Студенттер ұсынған AI-модель қолмен талдаудан интеллектуалды және предиктивті тәсілге көшуге мүмкіндік береді.

Жобаның негізіне алынған алдын ала зерттеу нәтижелері бойынша модель жоғары көрсеткіштерге ие: AUC шамамен 0,96, R² шамамен 0,94, ал интеллектуалды талдау мен болжауды пайдалану арқылы жүйенің энергия тиімділігін 18%-ға дейін арттыруға болады. Бұл нәтижелер шешімнің одан әрі дамуы мен оны университеттік және зерттеу бағытындағы ғарыштық жобаларда қолдану мүмкіндігін көрсетеді.

Команда халықаралық финалда жеңімпаз атанбағанымен, ActInSpace 2026 байқауына қатысу Satbayev University студенттері үшін маңызды тәжірибе әрі халықаралық инновациялық ортада жұмыс істеудің құнды кезеңі болды. Халықаралық деңгейге шығу студенттік инженерлік жобалардың бәсекеге қабілетті екенін және университеттің жас зерттеушілерінің әлеуеті жоғары екенін көрсетті.

ActInSpace — ғарыш саласының ірі ойыншылары қатысатын, инновацияны, кәсіпкерлік ойлауды және ғарыштық технологияларға қызығушылықты дамытуға бағытталған халықаралық байқау. 2026 жылы байқаудың халықаралық кезеңі Бордо қаласында өтіп, өз елдерінде іріктеуден өткен командаларды біріктірді.

SUniverse командасының ActInSpace 2026 финалына қатысуы Satbayev University-дің инженерлік білім беруді дамытуға, студенттердің ғылыми-техникалық бастамаларын қолдауға және жастарды ғарыш индустриясының өзекті міндеттерін шешуге тартуға деген ұстанымын айқын көрсетеді.