Талапкер
Студент
Түлек
Қызметкер
Курстар
Бизнес серіктес
Сәтбаев университетінде «Таза Қазақстан» акциясына арналған плакаттар көрмесі ашылды
Сәтбаев университетінде республикалық экологиялық «Таза Қазақстан» бастамасы аясында жасалған студенттік плакаттардың көрмесі ашылды. Сәулет және құрылыс институтының студенттері жасанды интеллект пен дәстүрлі көркемдік техникаларды қолдана отырып әзірлеген жұмыстарын көрмеге ұсынды. Қатысушылар осылайша экология мәселелеріне және адамның табиғат алдындағы жауапкершілігіне назар аударуды мақсат етеді.
Болашақ сәулетші Илона Антонованың айтуынша, оның жұмысы Алматының таулы экожүйелерінің нәзіктігін көрсетеді: «Тау – біздің қаламыздың маңызды символы. Алайда, өкінішке қарай, тауға барған адамдар өздерінен кейін қоқысты жиі қалдырып кетеді, бұл табиғатқа және жойылу қаупінде тұрған ақ барыс сияқты жануарларға зиянын тигізеді. Тауларды сақтай отырып, біз өзімізді де сақтаймыз».
Көрмені ұйымдастыруға «Графикалық дизайн» мамандығының студенттері де атсалысты. Үшінші курс студенті Егор Шагаев бұл жоба жастардың экологиялық санасын қалыптастыруда аса маңызды екенін атап өтті: «Осы акция аясында біз әлеуметтік маңызы бар плакаттар әзірледік. Сөйтіп адамдарға әлі де көп нәрсені түзетуге болатынын және таза Қазақстан үшін әрқайсымыз жауапты екенімізді еске салғымыз келді».
Экологиялық көрме университеттің табиғатқа ұқыпты қарау мәдениетін дамытуға бағытталған бастамаларды қолдауының бір бөлшегіне айналды. Сәтбаев университеті студенттердің әлеуметтік және экологиялық жобаларға қатысуын нығайта отырып, болашақ мамандардың белсенді азаматтық ұстанымын қалыптастыруды жалғастыруда.
