Талапкер
Студент
Түлек
Қызметкер
Курстар
Бизнес серіктес
Сәтбаев университетінің жас ғалымы министрдің қолынан пәтер кілтін алды
ҚР Президенті Қасым-Жомарт Тоқаевтың тапсырмасы бойынша Алматы қаласында Қазақстанның үздік жас ғалымдарына жаңа пәтер құжаттарын табыстау рәсімі салтанатты түрде өтті. Солардың қатарында Қазақстан Республикасы Ғылым және жоғары білім министрі Саясат Нұрбектің қолынан пәтер кілтін Сәтбаев университетінің жас зерттеушісі Назерке Бердіқұл да алды.
Сәтбаев университетінің ғалымдары ғылым мен қоғамдық өмірді үйлестіре отырып, түрлі салаларда табысты еңбек етуде. Назерке Бердіқұл – өзін ғалым, эко-белсенді әрі ана ретінде таныта білген жас зерттеушілердің бірі.
– Маған «Жас ғалым» бағдарламасы арқылы берілген тамаша мүмкіндік үшін шынайы алғысымды білдіремін. Осы бағдарлама аясында мен құрылыс және құрылыс материалдары саласында зерттеу жұмыстарын жүргізіп келемін, – деді ол алғыс сөзінде. – Бұл қолдау менің отбасыма қолайлы өмір сүруге және әрі қарай дамуға ыңғайлы жағдай жасап отыр.
Назерке Бердіқұл – құрылыс материалдары саласы бойынша танымал маман. Оның жобасы Алматы ЖЭО-2-ден алынған белсендірілген күл мен басқа да химиялық қоспалар арқылы бетон құрылымын модификациялау жолымен құрылыс материалдарының сапасын арттыруға арналған. Назерке – екі патенттің, беделді халықаралық журналдарда жарияланған 10-нан астам ғылыми мақаланың авторы, әрі «ТМД-ның үздік жас ғалымы – 2023» төсбелгісінің және «2023 жылдың үздік ғылыми қызметкері» атағының иегері.
Сондай-ақ Назерке – үш баланың анасы, ол қазақстандық қоғамның болашағына зор үлес қосып келеді. Оның еңбекқорлығы мен қоғамның ұлттық құндылықтарына деген ізгі ниеті құрылыс материалдары саласындағы өзекті мәселелерді шешуге ықпал етуде.
Сәтбаев университеті өз оқытушылары мен ғалымдарының жетістіктерін мақтан тұтады. Бұл білім беру, инновация және ғылыми жаңалықтар арқылы Қазақстанның болашағын қалыптастырып отырған университет ғылымының деңгейі жоғары екенін айқын көрсетеді.
