Талапкер
Студент
Түлек
Қызметкер
Курстар
Бизнес серіктес
Жеңіс – жүйе ретінде: Фаниль Рафиков пен Камил Гаджиев студенттермен бірге тәртіптің күші мен үлкен спорттағы технологияның орны туралы талқылады
Сәтбаев университетінде SU Talks жобасы аясында қазақстандық ММА жауынгері Фаниль Рафиков пен Fight Nights лигасының президенті Камил Гаджиев студенттермен кездесті. Әңгіме кәсіби спорт туралы ғана емес, сонымен қатар жеке тәртіп, жауапкершілік және кез келген салада ұзақ мерзімді стратегия құру қабілеті жайлы болды.
Фаниль Рафиков студенттердің сұрақтарына жауап беріп, соңғы спорттық жетістіктерімен бөлісті. Қазақстандық спортшы Fight Nights MMA лигасының жеңіл салмақтағы Гран-при турнирінде өнер көрсетіп, PFL Гран-приінің екі дүркін чемпионы Рэй Куперді жеңіп шықты. Спорттағы жетістіктері мен тамаша жеңісі үшін спортшыға Павлодар қаласынан пәтер сыйлады. Пәтер сертификаты кездесу барысында спортшыға зор қошеметпен салтанатты түрде табыс етілді.
Кездесу барысында спикерлер жарқын жеңістер мен көпшілік мойындаған табыстың артында не тұрғанын егжей‑тегжейлі талқылады. Күнделікті еңбек, команда рөлі, әр кезеңге дайындалу қабілеті және қысым көрген жағдайда сабыр сақтай білу маңызы сөз болды. Камил Гаджиев жоғары деңгейдегі спорт физикалық дайындық аясынан әлдеқашан шығып, ойлау, талдау және ұзақ мерзімді жоспарлау маңызды болатын күрделі жүйеге көптен бері айналғанын атап өтті.
«Мен адам жай сөйлеп қана қоймай, әрдайым нәтиже көрсетуі керек деп есептеймін. Күнделікті дайындық барлығын шешеді. Спортта істейтініміз өмірдің кез келген саласына тікелей қатысты», – дейді ол.
Болашақ инженерлер меңгеріп жүрген білім мен жаңа технологияларға да айрықша назар аударылды. SU Talks форматы студенттерге тікелей сұрақ қойып, алғашқы қадамдарынан бастап, халықаралық деңгейде табысқа жеткен адамдардың шынайы оқиғаларын тыңдауға мүмкіндік береді. Бұл кездесу Сәтбаев университетінде білім, тәжірибе және әртүрлі саланың көшбасшыларымен диалог бірігіп, студенттерді саналы таңдау мен өз-өзін дамытуға шабыттандыратын тағы бір үлгі ретінде болды.
